المواد التي لا تضاف الي المجموع 3ث طريقه مذاكرتها - بدون حضور حصص مراجعات

السلام عليكم ورحمه الله وبركاته 

طلاب الصف الثالث الثانوي

اعتذر طبعا عن غيابي فتره كبير لأنشغالي بكليتي وجامعتي ودي اول سنه ليا عقبالكم جميعا والجامعه والكليه حلوه جدا تستاهل اننا نتعبلها عشان نوصلها بجد حياه تانيه وعالم تاني خالص .. بالمناسبه عشان الناس اللي بعتالي بتسألني كليه ايه انا سياسه واقتصاد القاهره كنت أدبي .. بالتوفيق ليكم

 كلكم نخش ف صلب موضوع النهارده ..

اصدقائي واخوتي .. ف نفس الوقت ده السنه اللي فاتت كنت حرفيا تعبت مش قادرة اكمل حسيت بملل وفتور رهيب وده شعور طبيعي لأن معظمنا بادئ من شهر7 دروس لأ واتفاجئت كمان ان في ناس مأخدتش اجازه اسبوع ع الاقل من كل الدروس ف انتم والله ربنا يعنكم .. 

طيب قبل م أبدأ بردوا احب اوضحلكم خطتنا الاسابيع القادمه هنزل مراجعات لكل وحده + امتحانات باجاباتها + قطع نحو ةترجمه محلوله وامتحانات السنوات السابقه سواء مصر او  سودان وده عشان تدربوا وايديكم تمشي ف الحل وهكذا .. وهحاول اعملكم جدول لتنظيم الوقت عشان تلموا المنهج .. خير ربنا هيكرمكم وتقدروا توصلوا للي نفسكم فيه 

المواد التي لا تضاف الي المجموع 

(الاقتصاد - الاحصاء - التربية الوطنيه - التربيه الدينيه)

انا كطالبه كنت زيكم السنه اللي فاتت محضرتش ولا حاجه من الهري اللي فوق ده مش تقليل من الماده بس حرفيا انت مش محتاج تضيع من وقتك اسبوعين واكتر احيانا او 4 ساعات من يومك عشان تحضر ماده اقسم بالله مش هتذاكرلها غير ليله الامتحان اساسا .. فنفكر بمنطقيه بقي ونوفر وقت لأنك الفتره دي بذات هتسمع حوار "القنبله ف الاقتصاد " و " وحش الاحصا" و هري واستغلال غير طبيعي خاصه ف الاحصا والاقتصاد اللي الحصه فيهم بتوصل ل 50 او 60 ج ةمش حصه واحده لأ دده 3 و 4 حصص كمان مع ان الموضوع ابسط واسهل من كده بكتييير و ينزلولكم ب أسطوانه بقي " انا كان معايا طالب جاب 95% ووقع بسبب الاحصا او الاقتصاد او ماشابه من المواد التي لا تضاف والمدرسين عموما بيجاملوا بعض فهتلاقي المستر بتاعك دخل يهري ف الحوار ده هو كمان 

توضيح بسيط : انا مش بقلل من المواد دي وفعلا في ناس بتشيلها وبتخش دور ثان بسببها بس ده للي مش بيحلوا حاجه خالص اللي رايحين الامتحان ميعرفوش حرف عن الماده دي واحنا مش هنعمل كدا تمام .. !

* الاقتصاد والاحصاء :

الاقتصا بص ي كبير ماده حفظ ف حفظ حلو ليله الامتحان هنجيب ملزمه حلوه  كده من الملازم اللي المدرسين هيعملوها (وانا هنزلكم ملزمه عنب كويسه جدا جدا وكافيه) مش هقولك ابدء فيها من دلوقت والهري ده لاننا مبنبدأش وبتترمي لحد ليله الامتحان .. عندك وقت فاضي وانا اشك ف الموضوع ده يبقي خير وبركه خدلك جزء معندكش يبقي تنور ع المكتب بتاعك لحد ليله الامتحان .. غالبا بيكون الاقتصاد والاحصا ف يوم واحد سوا بيكون قبلها يومين يوم اقتصاد ويوم احصا .. الاقتصاد بقي هتجيب الملزمه وهتبدأ اليوم من اوله كده تحفظها والحفظ مش هيكون صعب باذن الله مش لازم تحفظ نصا احفظ اللي تقدر عليه لقيت الاجابه لسؤال معين 3سطور لأ احفظلك سطرين سطر نص منها بمعني اصح لخص انت معندكش وقت .. الحاجات اللي ليها نقاط كتير احفظ 3 منهم واقلب ع اللي بعده وهكذا اهم حاجه تكون واخد فكره وحافظ شويه والباقي "ألف" بس أأكد تاني لازم تكون داخل الماده عارف دايره عن ايه وتكون حافظ شويه حتي لو بسيط والاسئله فيها بتيجي واضحه .. الاحصا بقي ي كبير دي بقي اسهل لأنك كل اللي هتعملوا هتحفظ قانون بيرسون وسبيرمان ودول مسألتين مضمونين 100% ف الامتحان ولو حليتهم بس مع كام مسأله اختر انت عديت من الاحصا دي كمان هتجيب لها ملزمه محلوله تحفظ قوانين المسائل وتشوف طريقه الحل درب ايدك عليها وهتروح هتحل حلو اوي .. يعني كده محتاج ملزميتن واحده اقتصاد وواحده احصا ولو قبل الماده يومين يوم اقتصاد ويوم احصا والحياه هتبقي فل و المادتين بيكملوا بعض وخير باذن الله ..

*الوطنيه والدين :

مش هكدب عليكم انا عمري م ذاكرتهم اطلاقا ف ثانوي بس ف 3ث قلقت وجبتلهم ملازم وليله الامتحان بليل بعد لما خلصت مذاكره الماده الاساسيه امنت نفسي ةقراتهم شويه وحفظت شويه بردوا اللي قدرت عليه .. الدين كان صعب الحق احفظ سورتين ف يوم واكتشفت ف الامتحان ان السورتين كان عليهم 5 درجات بس ! فعملت ايه بالنسبه للدين كان معايا ملزمه حفظت الاسئله وكانت سهله لأن معظمها حاجات احنا عارفينها الحقيقه وقرأت تفسير الاحاديث والمعاني وحرفيا روحت حليت الامتحان كلو عدا السورتين وومنقصتش غير درجات السورتين والبقيه حليتهم صح .. الوطنيه دي بقي بالنسبه لبتوع ادبي هتكون سهله لان في جزء منها عن ثوره 23يوليو ة25 يناير و6 اكتوبر وحاجه عنب بقي عشان ده منهجنا ف التاريخ اصلا وبالنسبه لعلمي متقلقوش سهله جدا وبسيطه فهتعملوا ايه ي شباب بقي ملزمه واقرؤها ولو قدرتوا تحفظوا كان بها مقدرتوش اهم حاجه اقرؤها بفهم عشان تعرف تألف أو "تهبد" صح مش اي رغي وخلاص .. وفي ناس علفكره ف الدين والوطنيه مذاكروهاش وعدوا عادي بس انت مش ضامن ف أمن نفسك وع الاقل اقرأ فيها اي حاجه للامان بردوا .. 

*الخلاصه :

ال4 مواد دي مش محتاجه دروس والله محتاجه 4 ملازم حلوين وليله الامتحان بعد الانتهاء من مذاكره الماده الاساسيه امسكهم ساعتين بس وانت هتظبط الدنيا .. أمن نفسك ومتتجاهلهمش انت مش ضامن اللجنه هتكون عامله ازاي انا عن نفسي اقسم بالله ف 4 مواد دي اللجنه كانت صعب وحرفيا محدش اتنفس اصلا ف خلينا ف الامان ونقرأهم بس الاحصا اسمعوا مني والله احفظ القوانين او اتصرف وتخش بيهم يعني وكل واحد له طرقه بقي بس للامان احفظهم أريح وأضمنلك طبعا هتخش تحل مسألتين بيرسون وسبيرمان وكام مسأله اختر والاقتصاد تحل نص الاسئله ع الاقل والمادتين بيكملوا بعض وهتكون ف السليم جدا .. الوطنيه والدين اقرأ حتي لو محفظتش هتعرف ترغي عكس الاحصا والاقتصاد يعني

*اهم حاجه وده اللي انت عايزه :

هنزلكم 4 ملازم حلو .. واحده احصا وواحده اقتصاد محترمه وواحده وطنيه والاخيره دين 

الاحصا هتحفظ قوانين وتشوف مسائل محلوله .. الاقتصاد تقرا وتحفظ حتي لو جزء بسيط من الاجابه مش الاجابه كامله .. الدين والوطنيه اقرئهم حتي لو ف الطريق هتعرف تحل عنهم ..

أنتظروا الملازم ف اليومين دول باذن الله حملوهم وخليهم عندكم ع الفون او اطبعوهم لو حابين

 (انا كنت بذاكرهم pdf من الفون وكان اشطا جدا ونقصت ف الاحصا والاقتصاد 4 درجات والوطنيه قفلتها والدين نقصت 6 بتوع السورتين وكنت مذاكره ليله الامتحان بس كمان)

خير متقلقوش المشوار قرب يخلص والجاي افضل ..

اي مشكله عايزين اتكلم عنها اي ملازم او جزئيات حابين انزلكم عنها راسلوني ع البيدج او ف التعليقات انا بقرأهم وبرد عليكم والله وأكيد هنزلكم مراجعات باذن الله حلوه اوي وهتفيدكم جدا 

ربنا يكرمكم وتحققوا احلامكم كلكم ♥