طرق المراجعه الفعاله 3ث - طريقك للوصول الي 100%- أخطاء تجنبها اثناء المراجعه

السلام عليكم ورحمه الله وبركاته 

اصدقائي وزمايلي واخواتي .. اتمني تكونوا بخير ♥

خلاص مشواركم قرب يخلص .. الثانويه قربت تروح باي باي ومترجعش تاني بإذن الله .. خلاص هتخلص دراستك المدرسيه وتنتقل لدراستك الجامعيه .. الحياه اللي معظمكم راسمها بقي عن الجامعه "طارق كابو والشله الكريمه .. الحفله اللي كل يوم عند واحد من الشله " بلاش احرقلكم مفاجئه الجامعه واسيبكم تتفاجئوا وتنبهروا زينا كدا 

طيب معظمكم خلص وابتدي مراجعات .. وجزء تاني مخلصش ولسه مبدئش مراجعات واحب اقول للجزء ده عادي جدا لسه بدري قدامكم وقت

فبلاش المعظم اللي خلص يقول للجزء الليمخلصش انك مش هتلحق والهري ده وكل واحد يخليه ف حاله فضلا يعني ..

انا واحده من الناس السنه اللي فاتت خلصت منهج مع مدرسيني ف شهر 2 وكان معايا مادتين تقريبا خلصوا ف اول 3 ! وعادي جدا راجعت بدل المره 10 وحليت كتب كتير كمان فمش مقياس يعني ان حد يخلص بدري وحد يخلص متأخر 

طيب نخش ف الموضوع بقي 

يعني ايه مراجعه اصلا ؟ يعني المفروض اعمل ايه ؟ وهل لازم احضر مراجعه المستر بتاعي ؟ ولا ممكن اراجع لوحدي ف البيت وأوفر وقت ؟ هراجع ازاي ؟ 

جميل اسئله بتدور ف ذهننا كلنا .. 

اولا يعني ايه مراجعه ؟ يعني اعاده استذكار ما تم مذاكرته بالفعل بمعني انك هتعيد حاجه انت كنت مذاكرها بغرض انك تفتكرها وتنشط دماغك تاني لأننا لما بنذاكر الحاجه بتفضل ف دماغنا لفتره وبعدين بتنتقل للذاكره المؤقته يعني انت منستهاش ولا حاجه لا انت بس محتاج تفتكرها تاني تعيدها تكررها مره كمان عشان ترجع تاني .. تمام ؟

المفروض تراجع ازاي ؟ بص بقي موضوع المراجعه بيختلف من شخص الي اخر مفيش طريقه فضلي او مثلي كل واحد وله اسلوبه وطريقته بس انا واحده مجربه طريقه معينه علي مدار 3 سنين ثانوي ولقيتها فعاله جدا وانا هقترح عليكم الطرق 

الطريقه الاولي : 

طريقه تلخيص المنهج في صوره س و ج ودي بتجيب نتيجه حلوه جدا وبتلملك المنهج كويس ومعظم المدرسين بيمشوا بيها وناجحه جدا علفكره -انا مكنتش ماشيه بيها وانا مش معيار يعني ف عادي - و المدرسين بيعملوها كنوع من التخفيف عن الطلاب ولم المنهج بصوره حلوه وبنلاقيها كمان ف كتب المراجعات بتلاقي المنهج كلو او كل وحده ليها اسئلتها والمفاهيم بتعتها وهكذا ودي طريقه جميله وبتوفر وقت كمان يعني مثلا انت كطالب خلصت مراجعه اول وحده من ملزمه او كتاب مراجعه ملخص منهج الوحده دي ف صوره س و ج وعرف ودلل  وهكذا بعد لما تخلصها لازم لازم لازم تحل بعدها .. انما حوار انك تراجع وتقلب الماده منغير حل ده ولا ليه اي لزمه لازما ولا بد من الحل ..

الطريقه الثانيه : (طريقتي)

طريقه المراجعه من الشرح يعني ترجع للملازم الاصليه او الكتاب بتاع الشرح اللي كنت بتذاكر منه وبالنسبالي دي كانت افضل ليا لاني كنت براجع المنهج كلو بمعلوماته كلها ف بالتالي اقدر احل اي سؤال يجيلي لاني مراجعه منهجي كلو كشرح وبعد لما اخلص واحده معينه بنتبعها بالحل عليها ودي ضروري جدا موضوع الحل ده 

الطريقه الثالثه :

ودي غريبه شويه بس لقيت ناس بتجربها وماشيه بيها وبتقول كويسه مع انها بتتنافي مع تعريف المراجعه اساسا والطريقه عباره عن انك مثلا عايز تارجع الوحده الاولي ف الجغرافيا مثلا فتروح جايب مجموعه تمرينات وتحلها والسؤال اللي يقف معاك تشوف اجابته وتحفظها وتكمل ..

وطبعا في طرق كتير وزي م قولت مفيش طريقه فضلي او مثلي كل واحد واسلوبه وطريقته وانا بقترح بس مش اكتر كنوع من المساعده والاستفاده من خبرات بعض ليس الا ..

موضوع مراجعات المدرسين ..

انا كطالبه اول لما مدرسيني خلصوا منهج قعدت من كل الدروس ع اعتبار ان المنهج بالفعل تم شرحه وانا كنت براجع باستمرار طوال فتره الدراسه -زي م شرحت لحضراتكم قبل كدا ف موضوع - فكنت شايفه اني ملمه بالمنهج ومش محتاجه انه يتشرحلي تاني وفعلا قعدت من كله ووفرت وقت كبير جدا وقدرت اني اراجع من خلال ملازم الشرح الاصليه واشتريت كتب مراجعه نهائيه وبقيت كل جزئيه اراجعها الحقها بالحل عليها من الكتب الخارجيه اللي كانت غالبا لامه اسئله امتحانات سابقه بالاضافه الي الكتاب المدرسي وهكذا ..

طيب يعني احضر مراجعات ولا لا ؟

انا مقدرش اقولك تحضر ولا لأ بس أقدر اقول "رحم الله انسان عرف قدر نفسه " انت شايف نفسك ملم بالمنهج ؟ شايف نفسك هتحافظ انك تراجع مع نفسك بانتظام وتحل ؟ ولا هتقعد من الدروس تلعب وتلهو ؟ هتقعد وتضيع وقت وترمي حوار المراجعه ده يبقي لأ خليك مع مدرسك افضل ليك .. انما هتعرف تراجع لوحدك وتنظم لنفسك وقت انك تراجع قدر معين من كل ماده كل يوم وتلحقه بالحل عليه وتصحح لنفسك من خلال الاجابات يبقي  حلو جدا اقعد وانت مطمن 

طيب لو وقف معايا اسئله ي ناصحه هعمل ايه ؟

طبيعي انه يقف معاك اسئله ده حتي لو بتحضر درس هيقف معاك انت مش اينشتاين الماده .. بس بسيطه هتسأل مدرسك من خلال الفيسوبك او الواتس او ماشابه ..لو استاذك معندوش اي حاجه من دول يبقي زميلك تتصل بيه تسأله معرفش يبقي تطلب منه انه يسأل المستر ويعرفك .. زميلك ندل و هينفضلك خلاص ي قمور يبقي كل اسبوع تخصص لنفسك يوم تجمع فيه اسئله الاسبوع اللي وقفت معاك وتروح تسأل اساتذك ومظنش ان فيه استاذ مش هيرضي يجاوبك .. انا كنت بعمل كده والمستر كان بيرحب جدا وبيقولي ف اي وقت وقف معاكي حاجه متتردديش انك تجيلي لأ ده كمان كان بيشجعني ويقولي "اسلوبك حلو جدا وفعلا انتي مش محتاجه مراجعه كملي وربنا هيكرمك وانا موجود ف اي وقت تعالي " ف لو هتاخد خطوه انك متحضرش مراجعات دي خليك واثق ف نفسك واعمل لنفسك نظام امشي عليه 

هتنظم المراجعه ازاي ؟ 

- لو هتحضر مراجعات مع مدرسك او الاستاذ بتاعك ف الحاله دي هتمشي ع النظام بتاعه .. الملزمه اللي هتاخدها هتتذاكر ف نفس اليوم وتتبعها بالحل من الكتاب بتاعه او اي كتاب مراجعه وهكذا والمستر عارف هو هيمشي معاك ازاي فمتشغلش بالك 

- لو هتراجع ف البيت يبقي تنزل تجيب كتب المراجعه النهائيه لكل المواد + تجمع ملازم الشرح لكل ماده .. تبتدي تشوف كل ماده كام وحده وتقسم ملازمك عليها بمعني مثلا الوحده الاولي ف التاريخ كانت عندي ف ملزمتين  الوحده الثانيه كانت ف 6 ملازم وهكذا كل يوم تراجع جزء من كل ماده وطبعا يومك هيكون فاضي من اوله لاخره معندكش درس هيعطلك او ياكل نص اليوم منك عشان متقوليش مش عندي وقت يعني مثلا خد وحده سهله مع وحده تقيله فمثلا في التاريخ الوحده الاولي كانت ف ملزمتين وكان سهله تقدر تاخدها مع التانيه وتخلص وتحل عليهم سوا و العربي مثلا تاخد نصين + درسين ادب + درسين قراءه + تراجع وحده نحو + 3 فصول قصه وبعدين تخلص وتحل عليهم ويفضل انك ف موضوع القصه والقراءه سواء عربي او انجلش انك تقرئهم تاني يعني متراجعش س و ج علطول لأ راجع الدرس قراءه مره تاني وشوف المعاني وهكذا وبعديت خش الاسئله س و ج وراجع عليهم وهكذا .. والانجلش كل يوم راجع 3 يونتس وفصلين قصه مثلا وخلص وحل عليهم من كتاب المراجعه .. محدش يقولي مستحيل لان الموضوع سهل وانا وغيري كنا بنعمل كدا .. والجميل ف الموضوع انك هتلاقي نفسك راجعت مره واتنين وتلاته ع المنهج ف حين ان زمايلك اللي حضروا دروس لسه مخلصوش اصلا .. وده عشان انت معاك وقت اكبر ويومك كله معاك من اوله ل اخره غيرهم طبعا لأن الدروس وخاصه المراجعات بتاخد 6 او 7 ساعات وده تدمير لليوم ..

ايه كتب المراجعه الكويسه ؟ اشتري خارجي ولا اشتري كتب المدرسين بتوعي ؟ 

الكتب للمراجعه كتيير جدا بس مش كلهم بنفس الكفاءه طبعا انا هتكلم عن اللي جربته ..

انا اشتريت كتب مراجعات مدرسيني وندمت الصراحه لأن الكتب الخاريجه بتاعت المراجعه افضل بكتير غير كتب المدرسين خاالص 

فيفضل  مواد التخصص يكون كتاب الامتحان (خاصه للأدبي - والعلمي كمان كويسين جدا بس بيكون في كتب تاني أفضل) والانجلش فيه جيم وذا بيست حلوين جدا وف العربي بلاش الاضواء مراجعه هات الامتحان حلو جدا مليان اسئله مجابه وتحفه .. اللغه التانيه هات كتاب مدرسك اللي بتاخد معاه ..

أخطاء تجنبها وقت المراجعه :

1- متغيرش مدرسك متغيرش مدرسك متغيرش مدرسك  يعني متكنش طول السنه بتاخد مع فلان وعارف اسلوبه وملازمه وتقولي ف  المراجعات هحضر مع " اسطوره اللغه العربيه- او وحش الفيزيا- تنين الكيميا - والهري اللي بيظهر ف المراجعات ده ..

2- متراجعش من اكتر من مرجع منعا للتشويش يعني اللي كنت بتذاكر منه طول السنه بردوا تراجع منه عشان متتشتتش وده اللي معظمنا بنقع فيه بنيجي وقت المراجعه نشوف ملازم تانيه نراجع منها لا غلط مبقولكش متراجعش من حاجه خارخيه بس اقصد راجع من الحاجه اللي كنت بتذاكر منها طول السنه وبعد م تخلص ومعاك وقت بص ع اي ملازم تانيه شوف الاسئله ازاي وجمع افكار زياده وهكذا

3- متراجعش منغير م تحل وده بردوا اتكلمنا عنه فوق لازم وضروري بعد المراجعه تطبق بالحل مهم جدا جدا يعني 

4- ف القراءه والقصه والادب والنصوص ف اللغه العربيه يفضل انك تقرئهم مره كمان وتشوف المعاني متكتفيش بانك سمع شرح ومواطن جمال بس وده كمان ف الانجلش لازم تقرأ الريدينج مره كمان وتقرأ شابتر القصه مره تاني بفهم بحيث انه لو حور عليك ف الاسئله تكون فاكر النص الاصلي وتعرف تجاوب من خلال فهمك للنص وهكذا

5- ملكش دعوه بزمايلك ودي لازم تتبروز والله .. مشكل زمايلك عايزنلك الخير محدش عايز التاني احسن منه .. ومش لازم كل لما تخلص صفحه تخش تقولهم انا خلصت صفحه وتنشر وتسييح داري ع شمعتك ومقصدش بكلامي انك تقول لزمايلك اني مبذاكرش لأ طبعا متنشرش طاقه سلبيه اللي يسألك قوله الحمدلله بحاول .. عندك كلمه حلوه تحمس زميلك بيها قولها معندكش بلاش تحبطه .. مش عارفتذاكر متروحش تقول لزميلك مش عارف اذاكر المنهج صعب وبتاع لأ انت اجتهد وحاول ومفيش حخاجه اسمها مليش نفس او مش عايز اتعب هتلاقي ثمره تعبك خير وربنا مبيظلمش حد ..

6- ودي مهمه جدا ياريت الوقت اللي هتذاكر فيه ترمي الفون او اللاب او الكمبو والنت ف داهيه من فضلكم يعني .. عايز تفتح وتروح عن نفسك شويه يبقي بعد لما تخلص ماده معينه وتخلص حل امسك الفون نصايه او ساعه ولا حاجه كده مش اكتر عشان متفصلش مش كل لما تذاكر صفحه تفتح تقول اشوف زمايلي عملوا ايه او تفتح تقول ابص ع جروبات الثانويه وانت اساسا مش بتخش عليها وبضيع وقتك ع الفاضي 

مش هطول عليكم اكتر من كده رغم ان في كلام كتير نفسي اكتبه والله بس لو فتحت مش هقفل XD 

المهم احب اختم بكلامي باني اقولكم انتم تقدروا توصلوا للي نفسكم فيه .. انت او انتي مش قليله لأ انتم تستاهلوا انكم تجيبوا مجموع عالي تفرحوا اهلكم بيه متتخيلش فرحه والدك او والدتك او اخوك واختك وانتم رافعين راسهم بمجموع ينسيهم التعب والمصاريف اللي تعبوا وصرفوها متحرموش اهلكم من الفرحه دي بالله عليكم .. هتتعب دلوقت شويه بس هتستريح نفسيا بقيه حياتك مش هقولك الكليه مفيهاش مذاكره لأ فيها مذاكره بس مش هتكون مضغوط زي ثانوي بمعني اصح اهلك مش هيكونوا عايزين اكتير من انك تنجح ف الجامعه .. متخليش حد يشمت فيك او ف اهلك أبدء وذاكر والناس اللي كانت مش مذاكره حلو طول السنه لسه قدامكم وقت والله وزتقدروا تلموا الدنيا وتجيبوا مجموع كويس اوي كمان ابدء واجتهد وحاول وربنا مش هيضيع تعبك ده ابدا والله .. مش عيب انك تلجأ لربنا وتلتزم ف الصلاه حتي لو مكنتش ملتزم صلي والتزم ادعي ربنا كل لما تحس انك فقدت الامل صلي وادعي وربنا قادر علي كل شئ العيب ان بعد لما ربنا يكرمك انك توقف صلاه .. بغضالنظر عن الثانوي وعن اي حاجه الصلاه عموما وعلاقتك بربنا اهم شئ لازم تكون محافظ عليه ف حياتك الاعمار بيد الله ولازم تكون مستعد انك تقابل ربنا ف اي وقت والحاجه البسيطه اننا نقدر نعملها اننا نصلي ونقرأ قرآن نحافظ ع علاقتنا مع ربنا واهالينا .. 

ربنا يوفقكم ويحقق لكم امنيتكم ويسهلكم الصعب دايما