كيف تحصل علي 99% في الثانوية العامة - طريقك للوصول الي اوائل الجمهورية و الادارة - نصائح و طرق المذاكرة الفعالة

السلام عليكم ورحمة الله وبركاته  

السلام عليكم ورحمه الله وبركاته 

اصدقائي طلاب المرحله الثانويه

طلاب الصف الثالث الثانوي

ها قد بدأت رحلتكم مع مشوار الثانويه 

مشوار سيحدد مستقبلك .. مشوار تختتم به مرحلتك الثانويه لتبدأ ف المرحله الجامعيه

مشوار الثانوية و الخوف و القلق الكبير اللي قبلها ، بتبقى شايل هم السنة من قبل م تبدأها و من كتر الكلام المرعب اللي بتسمعه عنها بتحس انك داخل حرب ، او رايح تحرر بلد محتله وممكن تموت ، مع ان الموضوع ابسط واسهل من كدا بكتييير ، عايز بس تنظيم وقت و مذاكرة صح ، وهيبقى عندك وقت فاضي كمان تقدر ترفه بيه عن نفسك 

هبدأ معلش اتكلم عن الكتاب المدرسي
 (كتب الوزاره اللي مكنتوش بتستخدموها 1 او 2 ث)

ف 3ث من اهم الكتب اللي لازم وحتما تكون معاك هي كتب الوزاره (كتب المدرسه) ليها لزمه وفايده كبيره اوي .. ايوه يعني كتب مهمه جدا اهم من الملازم والكتب الخارجيه كمان .. لازم تهتم بيها 

*

تلميح بسيط :

1- لازم بعد لما تاخد اي درس وتروح قبل م تذاكره من الملزمه او الكتاب الخارجي او غيره لازم تفتح كتاب المدرسه وتتأكد ان اللي ف الملزمه او الكتاب الخارجي نفس اللي مكتوب ف كتاب الوزاره 

2- لو لقيت اي جزئيه ف كتاب المدرسه مش موجوده ف ملزمتك اللي مدرسك مديهالك او ف الكتاب الخارجي تنقلها وتحفظها وتحمد ربنا عشن ف ناس بتضيع بسبب الحكايه دي 

3- في مدرسين بيلخصوا كتاب المدرسه وبيسيبوا جزئيات انتم مهمتكم تراجعوا من كتاب المدرسه وتحفظوها وده اللي بيميز طالب عن طالب

4- دفعه 2018 ف العربي جه سوال ف النثر كان موجود ف كتاب المدرسه ف الاخر ومكنش موجود ف الكتاب الخارجي (الأضواء وغيره) ومدرسين كتير مهتموش بيه اصلا الجزئيه دي فطبعا ناس كتير شالت السوال ..

5- الأنجلش دفعه 2018 جه اسئله كتير من كتاب المدرسه  نفس الصيغه او القاعده بس الاسماء المعني متغير 

وكذلك ف باقي المواد ف أكيد كتاب المدرسه مهم جدا ..

6- مسائل الفيزيا والكميا بشهاده اصدقائي طلاب العلمي جت معظمها ان لم يكن كلها من كتاب المدرسه

شفتم هو مهم أزاي .. متستهونوش بيه من فضلكم 

هنتكلم ف موضوع النهاردة عن :

1- ازاي استعد للسنة اللطيفة دي؟

2- الدروس الخصوية و المدرسين 

3- هل كل المواد لازم اخد فيها درس ؟

4- طرق المذاكرة الصحيحة 

5- طرق المراجعة (ازاي منساش اللي ذاكرته؟)

6- مراجعة المنهج كامل لكل مادة مرة كل أسبوع (ليفيل الوحش)

7- ازاي احارب الملل اللي هيحصل ف نص السنة؟

8- مواجهة الكسل و ادمان النت و الخوف

9- ملحوظات ماسية

صل ع النبي كدا و اقرأمعايا براحة و اوعدكم مش هتزهقوا من اسلوبي .

1- ازاي استعد للسنة اللطيفة دي؟

مبدئيا كدا خليك صريح مع نفسك عايز تجيب مجموع وتفرح اهلك ؟ ولا عايز تعدي و تخش اي حاجة  و السلام ؟ لو عايز تخش اي حاجة و السلام يبقى بلاش تعب اهلك ودروس ع الفاضي طالما مش ناوي تفرحهم وتفرح نفسك بلاش المصاريف مش هيبقى حسرة ع المصاريف و ع المجموع مصيبة وحدة بدل مصيبتين ، ناوي تجتهد يبقى تعقد النية لله انك مش هتقصر اولا عشان تفرح نفسك لانك تستاهل ثانيا عشان تفرح اهلك وفرحة الاهالي بنجاح ابنهم خاصة بمجموع بتنسي اي تعب ثالثا عشان محدش ملوش لازمة يفرح فيك او ف اهلك لان معظمنا ان لم يكن كلنا في شوية عقارب ف حياتنا مستنين اي حاجة سيئة و يطبلوا عليها .

اهم استعداد لازم لازم لازم تحسن علاقتك بربنا لو مش ملتزم التزم و استغل السنة دي ف انك تقرب من ربنا و ده مش عيب خالص و هتعرف قيمة ده قدام ، مبدئيا كدا متوترش نفسك هتحتاج ورق كتير ، اجندة بقى ، ورق ابيض ،  و علبه اقلام اي نوع مش هتفرق ، و مكتب لطيف او اي مكان كويس و هادي تعرف تذاكر فيه انا بالنسبالي كنت بذاكر ع السرير عادي ، تحاول تظبط مواعيدك ونومك مع اوقات دروسك بحيث انك تعرف تذاكر و تروح درسك و ترجع تريح شوية ، ملكش دعوة باصحابك ملكش دعوة باصجحابك ملكش دعوة باصحاااابك ، حرفيا صديق واحد غلط ممكن يدمرلك سنة زي دي ف اهدى خالص كدا و اكتفي بذاتك ، مش هقولك انعزل عن الكل بس ف نفس الوقت متتعلقش بحد .

2- الدروس الخصوية و المدرسين 

اعرف ناس لطيفة كدا بتاخد المادة مع 22 مدرس و ف الاخر بعد م نص السنة تخلص تستقر مع مدرس تاني خالص ، وده خطأ كبير لو متعرفش مدرس كويس يبقى تسأل و تجرب اتنين و قبل شهر 10 تكون استقريت ع مدرس بتفهم منه و مش شرط طالما زميلك مش فاهم يبقى المدرس ده مش كويس لأ أهم حاجة انك فاهم و ملكش دعوة زميلك بياخد مع حوت الكيميا او ديناميت الفلسفة او عقرب التاريخ و ايرون مان الانجلش ، شوف ي ابن الحلال بتفهم مع مين و استقر عليه ، وطالما لقيت حد كويس ملوش لازمة تجرب مدرسين تانيين ، وبلاش اكترمن مدرس للمادة الواحدة متقوليش اصل ده بيشرح نحو حلو و الباقي مش كويس ، اصل ده ف الجرامر ممتاز بس ف القصة مش حلو ، لأ فوق كدا و شوف حد كويس يشرحلك و تفهم .

3- هل كل المواد لازم اخد فيها درس ؟

و الله مش عايزة افاجئكم و اقولكم ان الدروس ليس الا زيادة ف الاستيعاب ،بمعنى انك لو هتعرف تفهم لوحدك من خلال القراءة ة تشرح لنفسك و تبسط المعلومة وتحل كتير و تسمع لنفسك منغير مدرس ف احب اقولك انك هتجيب مجموع و هتقفل المادة كمان ، الفكرة كلها المدرسين بيبقى عندهم خلفية و نظرة بيعرفوا الجزئية دي بتيجي ازاي ، و الاسئلة اللي اتكررت عليها ، بيكون عندهم خلفية اكتر بشكل الامتحان و التكات بتعته مع ان الثانوية مش مضمونة و ممكن تتفاجئ انت و المستر بتاعك عادي ، علي سبيل المثال انا واحدة كنت بذاكر الانجلش لوحدي ، اه كنت مخططة لنفسي اني ف الاسبوع هخلص 2 يونتس و شابتر قصة و كنت احفظ الكلمات و اقرا الريدنج و ابص ع الجرامر و افهمه وبعدين أحل عليهم و اجي تاني يوم اسمع الكلمات و اراجع الجرامر و اصحح لنفسي اللي حليته من خلال الاجابات اللي معايا و هكذا ، وكنت متأقلمة جدا و الحمدلله ربنا كرمني و جبت 48 من 50 و كانت المادة كلها لوحدي،اقصد ان عادي جدا انك تذاكر لوحدك بس الفكرة هتسمع لنفسك ؟ هتراجع لنفسك ؟ هتعرف تفهم و تستوعب المادة لوحدك ؟ يبقى مبدئيا كدا تشوف نفسك هتعرف تبقى جدير بتحمل مسئولية ذاتك وتذكر بانتظام وتظبط نفسك ؟ مش هتعرف يبقى تشوف مدرس كويس و تمشي زي م بيقول . 

* ملحوظة : المدرس بتاعك مش سوبر هيرو هيشربك المادة و انت تروح فاهم و حافظ و يدوبك تحل ، لأ المستر عليه ان يفهمك و انت عليك تروح تجتهد و تذاكرها و تأكد فهمها تاني وتحل و تراجع يعني لو المستر عليه 30% فأنت عليك 70% مجهود ف البيت ، الخلاصة : قدراتك تسمحلك انك تذاكر المادة لوحدك يبقى مش هتحتاج مدرسك ، مش هتسمحلك وهتتوه ف النص يبقى خش مع مدرس

4- طرق المذاكرة الصحيحة و المراجعة 

خلينا متفقين اننا قدراتنا مش زي بعض ، اعرف ناس ممكن تروح من الحصة حافظة نص الملزمة يدوبك محتاجة ساعة ف البيت تأكد عليها و تبقى خلصت الدرس ، ناس تانية بتبقى فاهمة كويس وعندها مشاكل ف الحفظ فهتاخد وقت بيتراوح من 3 الي 4 ساعات ف الدرس الواحد عشان تظبط الملزمة او الدرس ، اعرف فئة تالتة عندها صعبة شوية فهتاخد وقت اكبر و هكذا ، بس ف المجمل ان ال3 انواع ف الاخر هيلموا الدرس مع اختلاف الفترات ، وز ده مش عيب منك ، او تفوق من التاني عنك لأ اطلاقا دي قدرات مش اكتر ف ناس ممكن تخلص الملزمة ال14 صفحة ف ساعة  بس كروتة  ومتعرفش تحط قلم ف التدريبات او الواجب و ناس تانيه تاخد 4 ساعات بس بردوا متعرفش تحل ، ليه؟ عشان مش مركزين او مكروتين الملزمة ، فبما انك كدا او كدا هتذاكر يبقى تحترم نفسك و تقضي ال4 او 3 ساعات بتذاكر صح عشان متتعبش نفسيا ، صل ع النبي و بص معايا 

1- اولا هتروح تحضر الحصة بتعتك و لو زميلك اللي جنبك رغاي او هرمون الفرفشة عنده عالي معلش احترم وقتك ونفسك ومتقعدش جنبه هما 3 ساعات يخلصوا و بعدين قوم خده بالحضن تاني مفيش مشاكل ، ترطكز ف كل كلمة و كل حرف بيتقال ولو المستر قال سؤال معين اكتبه وراه واعرف اجابته و افهمه كويس. لو بتذاكر ف البيت ف انت هتفتح الدرس من الكتاب الخارجي و تبتدي تفهم و بعدين تحفظ 

2- هتروح البيت تصلي اللي فاتك و تاكل حادجة خفيفه او تقيلة انجز يعني فهنقول معاك ساعة تتدلع فيهم حلو ؟ خلصت الساعة دلع ؟ كوباية شاي او قهوة او نسكافيه اي زفت يتشرب عشان تصحصح كدا ، هتفتح الملزمة بتعتك تقرأ جزئية جزئيه بفهم كدا وبعدين تبتدي تحفظ و الحفظ هيكون اواي؟ مش بالبوء كدا لأ ، تكرر الجزئية اكتر من مرة شفهي و بعدين اول لما تلاقي نفسك عارف تسمعها شفهي ابتدى سمعها بشكل كتابي مرتين كدا وانقل ع الجزئية اللي بعدها 

3- هتمشي بالاسلوب ده لحد م تخلص الملزمة اللي معاك، نفرض مثلا  و ده هيقابلك كتير جدا لقيت جزئية رخمة مش عارف تحفظها هتعمل ايه ؟ هتبتدي تقسمها لفقرات صغيرة و تحفظها حتة حتة ، طيب مثلا درس من 14 صفحة ورخم و حاسس اني وصلت للنص و تعبت خلاص خير و بركة احفظ نص الملزمة و افهمها كويس و حل ع الجزئية اللي ذاكرتها و كمل بقية الملزمة تاني يوم

4- بعد م تخلص الملزمة او جزء منها لزم لزم لازم ف ساعتها او بعدها علطول تسمعها كلها تاني شفهي و بعدين هوب تنط ع التدريبات حل ع قد م تقدر جمع افكار كتير من دلوقتي هتستريح قدام اووي 

5- فهمت وحفظت و حليت ؟ تمام خلاص ي باشا يبق الملزمة دي خلصت و اقفل المادة خلاص و خد بريك نص ساعة اة ساعة نام فيها بقى افتح نت ، اتفرج ع التلفويوت ، براحتك بس تلتزم ان اول لما الساعة تخلص ترجع تشوف بقية اللي وراك

6- ف الاول هتلاقي ان اي مادة او اي ملزمة هتاخد منك وقت مش عايزاك تتفاجئ ده طبيعي انك ف اول السنة و كنت بقالك 4 شهور مرنخ ف البيت ف الاول متتخضش لو لقيت نفسك بقالك 6 ساعات بتفهم وتذاكر و تحفظ و تحل ف مادة واحدة ده شيء طبيعي جدا

يبقي تلخيص النقط اللي فوق هي :

هفهم الدرس كويس -> هقسمه لجزئيات واحفظ جزئية جزئية بشكل شفهي -> هسمع بعد كدا كل جزئية ف شكل كتابي ع ورق-> نسمع بعد كدا الملزمة كلها ككل و اأكد حفظ الاجزاء اللي وقعت مني-> هخش ع الواجب و السؤال اللي يقف معايا ارجع اشوف اجابته و احفظها تاني ->هصحي تاني يوم اسمع الملزمة -> هفوت يومين واسمعها تاني -> قبل الدرس اراجع عليها مرة كمان

6- مراجعة المنهج كامل لكل مادة مرة كل أسبوع (ليفيل الوحش)

إزاي اراجع المنهج كلو كل اسبوع !!انا مش الرجل الأخضر يعني ؟

لأ مش الرجل الأخضر انت احسن منو XD 

ف اول لما بدأت دروس طبعا مبدأتش كل المواد كنت بدأت شويه ف نص 8 والباقي بعد العيد 

كنت اخد الملزمه احفظها واظبتها واحل الواجب وبعدين اصبح تاني يوم اسمعها افوت يومين واسمعها تاني وقبل الدرس اسمعها مره كده انت سمعت الملزمه المعينه دي 4 مرات كده المفروض لزقت ف دماغ حضرتك ..

بعد 4 اسابيع بقي عندي من كل ماده 4 ملازم تمام ؟

كنت مفضيه يومين عندي اجازه مفيهمش دروس خالص 

كانوا جمعه وسبت كنت باجي يوم الجمعه اسمع ملزمتين قدام من كل ماده والسبت اسمع الملزمتين التانين (وطبعا دي ملازم قديمه وبكده اكون سمعت المنهج لغايه م اخدت مع المستر بتاعي فكان علطول المنهج ف دماغي )

عدت اسابيه والملازم بتزيد طبعا وبقيت اكثف بدل م اخد يوم الجمعه ملزمتين قدام لأ اخد 4 قدام ف الجمعه و4 الباقيين ف السبت (طبعا مستغرب حضرتك لأ متستغربش احنا شرحنا اننا بنذاكر الملزمه ف يومها وبنسمعها 4 مرات فلما تيجي تراجع المنهج سبت وجمعه هتلاقي نفسك مش بتاخد وقت ومع التكرار هتحفظم صم)

عدت اسابيع واسابيع تاني وال4 ملازم بقو8 ثم 12 ثم 16 ثم 20 !! اه 20 ملزمه 

ها دول بردك كانوا ف يومين بيتراجعوا ؟ 

لأ طبعا ي أذكي اخواتك -_- هتخليهم 4أييام 

يمعني زي م قولت هتحاول تخلي عندك يومين فاضيين وليكن الجمعه والسبت 

انتي بقي هتزود عندك يومين كمان دول هيكونوا بتاخد دروس فيهم عادي 

وليكن الاربع والخميس والجمعه والسبت

هتسمع ف كل يوم منهم 4 ملازم من كل ماده تمام .. وزي م قولت دي عن تجربه مش هتكون صعبه هيجي عليك ملازم هتخلص تسمعيها ف 5 دقايق ايوه 8 صفحه هتخلص تسميعهم ف 5 دقايق من كتر م انت بتكررهم كل أسبوع ..

كده هتكون راجعت المنهج كتير أوي أوي يعني لدرجه انك ممكن تسمع الملزمه منغير م تبص ع راس السوال او الحته اللي انت هتسمعها ..

* تلميح بسيط قبل م نكمل :

* الثانويه مصاريفها كتير ايوه كتير ده غير مصاريف سيادتك الشخصيه فلو حضرتك داخل تدلع وتحضر دروس وكأنك مبتحضرش ف حرام اتقي الله ف اهلك لو داخل عشان تعدي لأ ي حبيب ماماي خليك ف بيت اهلك وذاكر ف بيتك وبلاش فلوس دروس احسن 

فرحه نجاح الثانوي دي متتوصفش .. حاجه خيال والمصحف فرحه غير كل فرحه .. ابوك ولا امك ولا اهلك لما يشوفك عديت 95 او 90 بيكونوا طايرين بيك والفرحه جواهم متتوصفش متحرمهمش من فرحه زي دي بالله عليك.. اتعب هتلاقي وربنا هيكرمك والله ..ذاكر بضمير والامتحان سهل صعب هتلاقي نفسك بتحله حلو اوي ..

* ألتزم ف الصلاه .. التزم ف الصلاااااااه .. خلي علاقتك بربك حلوه ادعي كتيرمش عيب انك تلجأ لربنا حتي لو كنت مش منتظم انتظم السنه دي يمكن ربنا يكرمك وتنتظم بقيه حياتك انا كان في عليا ايام كانت الدروس بتبقي صعبه كنت ادعي لربنا وعمره م خيب ظني كنت بلاقي نفسي بحفظ والملزمه بقت سهله ..

1- متغيرش المدرسين كتير ف اول السنه جرب مع واحد حصتين مفهمتش وانا أشك ف الموضوع ده غيره وبس متغيرش تاني لو سمحت اتكل ع الله وربنا هيكرمك .. 

2- مدرسك بيكون زي الفل وشرحه جميل وبتفهم منو يجي واحد زميلك عاق يقولك لأ ي عم ده وحش شوف انا باخد مع المدرس الفلاني استاذ ويروح رزعك كام سؤال المدرس بتاعه مألفهم عشان يحبطك ويخليك تاخد مع المدرس بتاعه وف الاخر بتسمع كلامه وانتم الاتنين بتتسوحوا وترجعوا زي البط للمدرس الأولاني -_-

3- الملزمه تتذاكر ف يومها ..  الملزمه تتذاكر ف يومها  ..  الملزمه تتذاكر ف يومها  .. الملزمه تتذاكر ف يومها  .. كفايه ولا أقولها تاني ؟ 

4- البنات الحلوين اصحابي وصديقاتي الأفاضل مش لازم كل حصه طقم كل حصه يكون وشك سوبر لوكس يعني كل ولاد الدروس معفنين مفيهمش حد عدل ف ريحي دماغك وانتي مش نانسي يعني -_-

5- البنات تاني بعد الدرس فضلا وليس امرا مش لازم ساعتين بترغي مع صحبتك خلصي وع البيت علطول  .. 

6- الولاد والبنات اقولكم اقطعوا علاقتكم بصاحبكم اه معلش .. طبعا ف ناس كويسه بس صدقني هيبقي فيه غل وحقد وواحد يكون فارم الكتاب يقولك والله بقالي اسبوع مبمسكش كتاب وبنت تقولك ي بنتي كبري دماغك تعالي نروح نتمشي ونبقي نصور الملزمه دي تخلعي اللي ف رجلك وترزعيها بيه 

7- مش لازم لو جزئيه صعبه مع حضرتك تتصل بصاحبك تقوله الحته دي وحشه صعبه مبتتحفظش بلاش الطاقه السلبيه احتفظ بيها لنفسك فلتقل خيرا او لتصمت .. تبا لك .. 

8- ي سلام بقي لو اتصاحبت ع واحد شاطر يحمسك ع المذاكره ويكون بينكم تنافس .. تنافس شريف بدون غل وحققققققققد والنبي ..

9- داري ع شمعتك تقيد ..

7- ازاي احارب الملل اللي هيحصل ف نص السنة؟

- الملل الملل الملل

ف أول السنه بيبقي في طاقه فظيعه تحس انك متحمس بقي وهاكل المنهج ومين اوائل جمهوريه ناوو والجو ده 

ودي حاجه حلوه استغلها واستغل الحماس واظبط اول المنهج صح 

هتيجي ف النص كدا عندك ملل زهقان شويه .. هتحاول بقي ف الحاله دي انك تحمس نفسك ايوه تحمس نفسك يعني قول هذاكر الملزمه دي واخد نص ساعه راحه اعمل فيها اي حاجه .. هخلص الملزمه دي واقوم اسلي نفسي نصايه كدا وارجع اكمل  .. كنت بعمل حجه هبله كدا بس بتخليني متحمسه ع المذاكره اوي .. كنت اجيب ورقه وعندي علبه الوان بقالها قرن  ف الدرج كنت قبل م انام اكتب الحاجات اللي المفروض اذاكرها تاني يوم كل ماده بلون مختلف ولما اخلص منهم حاجه اعمل  جمبها علامه صح الحركه دي كانت بتخليني متحمسه اكمل الجدول اللي عملته وكنت احيانا مبقدرش اكمله كلو كنت احس بالذنب واقول بكره هخلص الجدول واعمل واحد جديد لمواد بكره وهكذا بقي .. 

8- مواجهة الكسل و ادمان النت و الخوف

الناس المدمنه نت 

حبايب قلبي الحلوين مضطرين انكم تضحوا شويه معلش 

اه معلش ي جميل مش هتعرف تكلم الأكس .. ارحم نفسك شويه كفايه مرقعه 1 و 2 ث .. السنه دي محتاجه تركيز ومجهود والنت بيضيع كل ده 

انا بصراحه مش من مدمني النت فمكنش فارق معايا وكان عندي وايفاي كمان والله مكنتش بفتح (ممكن بليل افتح اسأل صحبتي هنتقابل الساعه كام درس بكره وشكرا بقفل) 

مش هرخم واقول حط خطك ف موبالي نوكيا بكشاف بس هقولك حاول تسيطر ع نفسك وتوازن بين الم1اكرة و النوم و الترفيه مع انك مع الوقت هتكتشف انك لو لقيت وقت فاضي هتستغله ف النوم و الله 

- الكسل الكسل الكسل -_-

بكون زي الفل ف الدرس برجع البيت نعسان 

اول لما افتح الملزمه مش طايق ابوها 

اول لما ابتدي اذاكر احس اني نعسان وجسمي مكسر 

اقولك انا بقي كلام سليم .. حاول تظبط نفسك انك تنام ف اليوم كلو 7 او 8 ساعات بس حلو .. نمت زياده عن كدا هتحس انك نعسان باقي اليوم .. نفترض كان عندك درس الساعه 8 راجع تعبان ونعسان خالص خلاص عادي ي عم خش اتخمد ساعه وقوم عادي جدا 

لما تقوم اعلمك كوبايه شاي واستعين بالله وأبدأ .. سااعه نوم بس دي قليله لأ مش قليله انت كده اشبعت رغبه النوم اللي عندك حتي لو نمت ربع ساعه هتصحي مكسل شويه لكن بعد 5 دقايق هتلاقي نفسك فوقت وبقيت زي الفل عن تجربه والله .. 

الخوف ده شيء طبيعي ايوة هتلاقي نفسك خايف شوية من الكلام االسلبي اللي بتسمعه و هتسمعه المدرس غصبا عنه ممكن يوترك شوية عشان تذاكر بس صدقني طالما هتعمل اللي عليك و تجتهد ربنا عمره م هيخذلك او يضيع تعبك ابدا 

اخر نقطه هتكلم عنها ف الموضوع ده :

هتيجي عليك شويه ملازم حقيره ! ايوه حقييييره مش عارف تحفظها كل م تحفظ جزئيه تنسي التانيه .. هيسيطر عليك شعور انا فاشل انا غبي انا هسقط .. فكك من كل دا 

مثال : اخدت ملزمه تاريخ 8 صفح طويله ورخمه بصراحه كل اما تحفظ حته حته تانيه تبوظ اتخنقت وزهقت .. هتروح ي عم الناس تقسم الملزمه يعني الملزمه 8 صفحه هاخد نصها النهارده والباقي بكره يعني اخد 4 انهارده اظبتهم وبكره اسمعهم واخد الباقي 

متقارنش نفسك بغيرك ، اجتهد و اشتغل ع نفسك ، انت تقدر تجيب ال98 و 99% بسهولة ، حل كتير جمع اكبر قدر من الافكار افهم صيغة السؤال كويس ، راجع كتير 

سامحوني طولت عليكم اسفه  بس حبيت نستفيد كلنا والله 

وخليك واثق انك ع قد م هتذاكر ع قد م هتجيب انا اتظلمت ف درجه العربي بس ف نفس الوقت جبت مجموع عالي ودخلت اعلي كليه ف ادبي كمان فمتقلقش ربنا مش هيضيع تعبك وحاجه بتعوض حاجه ذاكر واتعب وطلع افضل م عندك عشان ف الاخر تلاقي افضل حاجه ربنا يكرمكم ي رب ويسهل عليكم موادكم وييسر حالكم ي رب 

اي استفسار عن اي حاجة او اي مشكلة هتقابلكم دلوقت او بعدين ممكن تسيبوها ف التعليقات بتاعت المدونة او تراسلونا علي الصفحة بتعتنا و احنا علطول بنرد معانا اوائل ادبي و علمي علوم  و رياضة و ناس قمة ف الادب و الذوق و هتفيدك ف اي وقت بإذن الله