كيفيه الحصول علي الدرجه النهائيه في المواد الأدبيه - طريقك 98% فأكثر الجزء 2 - 240 درجه ف أيدك

السلام عليكم ورحمه الله وبركاته 

اصدقائي طلاب المرحله الثانويه

طلاب الصف الثالث الثانوي

ها قد بدأت رحلتكم مع مشوار الثانويه 

مشوار سيحدد مستقبلك .. مشوار تختتم به مرحلتك الثانويه لتبدأ ف المرحله الجامعيه

الناس اللي مشفتش الموضوع الاول ياريت تشوفه مهم مهم مهم 

ويعتبر تمهيد للموضوع ده يعني لازم تشوف الموضوع الاولاني 

الموضوع الاول 

كيف أحصل علي 98% فأكثر في الثانويه العامه ؟ طريقك نحو التفوق + طرق لمذاكره الفعاله

طبعا بعد الأقبال الرائع ع موضوع كيفيه الحصول علي 98 % فأكثر 

والرسائل الجميله اللي جت ع البيدج بتاعت المدونه 

والتشجيع الجميل 

حبيت اكملكم بقي 

الناس اللي مشفتش الموضوع الاول ياريت تشوفه مهم مهم مهم 

************

زمايلنا العلمي سواء رياضه او علوم .. مش نسياكم والله وهشوف حد مخضرم كده من الاصدقاء اللي جابوا 99% هخليه يظبتكم باذن الله + هنزلكم قريب شرح واسئله ع الباب الاول من كل ماده 

************

ندخل علي مضمون الموضوع بقي ..

طبعا الموضوع باين من عنوانه .. الحصول علي الدرجه النهائيه ف المواد الأدبيه 

يعني بالعربي ازاي نقفل المواد الأدبي ..

احنا كطلاب ادبي عندنا مواد التخصص 4 

التاريخ 

الفلسفه والمنطق

علم النفس والأجتماع

الجغرافيا 

وانا مرتباهم من الأصعب للأسهل ..

أه يعني هتلاقي اول ماده تقيله هي التاريخ (ماده محترمه ليها وزنها)

الفلسفه والمنطق (ماده محتاجه حفظ بشكل كبير الا انها حلوه يعني)

علم النفس والأجتماع (ماده كبيره بس ف الحفظ سهله وخفيفه)

الجغرافيا (عارفين الفسحه اللي بتبقي وسط الحصص ف المدرسه ؟ او المرواح بعد يوم فيه 8 حصص ؟ او يكون عندك حصتين العاب وحصتين فاضيين فيبقوا 4 العاب اهي الماده دي احسن واحلي واخف ماده هتقابلكم والله)

قبل م أكمل الفت نظركم لحاجه ان ال 4 مواد لو اتقفلوا انت ضامن بعون الله 240 درجه ف جيبك 

وسهل يتقفلوا جدا 

هنتكلم عن كل ماده وازاي نلمها ونظبتها لأ ونقفلها كمان اخر السنه

و زي م قولت ف الموضوع الاولاني ان احنا كأدبي عندنا 20% فهم و80% حفظ 

واللي يقولك لأ هفهم واكتب ب اسلوبي ده شكرا يدوبك ياخد درجه او نص درجه 

متقنعنيش انك هتتساوي بالطالب اللي كاتب نفس نص كتاب المدرسه

بمعني مين ياخد الدرجه كامله اللي كتب بنص كتاب المدرسه ؟ ولا اللي فهم وقعد يعبط ويهبد ف اي كلام ؟

هما الأتنين فهموا بس واحد كتب بنص كتاب المدرسه والتاني عمل فيها شبح ..

وف الاخر تخرجوا تقولوا احنا مظلومين ونقصنا ف الدرجات جامد -_-

* التاريخ :

ماده كبيره مجعلظه كدا تحسهاضخمه الا انها حلوه 

اه حلوه 

التاريخ عندكم 8 فصول 

هتاخد أبو علي (محمد علي و الاسره الكريمه) و هتاخدوا الحربين العالميتن و تونس ع الجزائر ع ليبا ع شويه العراق ع حرب فلسطين واكتوبر وشويه هري كدا

اي ماده ف الاول متعبه وده كلنا متقفين عليه 

اه هتتعب ف اوول الماده 

ممكن تاخد ملزمه 8 صفح تقعد فيها 4 ساعات او تقعد ساعه بتحفظ ف صفحه ونص مثلا 

وده طبيعي لأن المداه دي عن غيرها مليانه وتفصيلها كتير 

-مهمتك :

تركز ف الشرح جامد أه جامد أوي كمان التاريخ ميزته انك لو ركزت مع المدرس بتاعك هتلقط منو كتير يعني ممكن ف الحصه تحفظلك شويه حاجات متفرقه ..

* تروح البيت أوعي تركن الماده أوعي تركن الماده .. التاريخ خاصه عن كل المواد لو متذاكرش ف يومه مش اتبخر ده اتحرق حضرتك .. ترح تصلي وتاكل حاجه خفيفه وكوبايه الشاي بتعتك والمايه جمبك وتشمر وتستعين بالله وتبدأ .. وطبعا شرحنا هتذاكر ازاي ف الموضوع الاول  (اللي مشفش الموضوع انا حاطه اللينك بتاعه فوق )

*خلصت الملزمه وسمعتها كلها تاني بعد م خلصتها زي م اتفقنا ف الموضوع الاول .. تخش ع الواجب وتحل ..

*طبيعي انه يقف معاك سوالين تلاته لأن التاريخ بيتميز ان اسئلته محتاجه جزء من الفهم يعني مش هيسألك سوال واضح وتجاوب لأ فيه كام سوال كده أسمهم التميز اللي بيفرقوا طالب عن طالب دي بقي تركز فيها .. معرفتش تحلها هتضطر تسألك معلمك ومع الوقت هتلاقي نفسك مش هتحتاج تسأله 

*الملزمه خصلت ؟ حليت الواجب ف نفس اليوم ؟ تصحي تاني يوم تسمع الملزمه تاني ولو جزئيه وقعت منك هتلمها تاني

*فوت يومين وسمعها مره كمان .. اه اطمن عليها دي هتفضل معاك 8 شهور ي بابا ف اطمن عليه عشان متزعلكش XD 

* كده ذاكرتها مره سمعتها تاني يوم مره فوت يومين وسمعتها تاني معلش بقي قبل الدرس لازم تتسمع مره كمان عشان لو المستر قومك مبيبقاش شكلك وحش -_- .. كده ي حضرات الدرس اتذاكر 4 مرات يعني بمعني اصح أكلت الدرس وكمان ظبط الحتت اللي وقعت منك .

* سمعاك ي محبط يللي بتقول لأ طبعا صعب هو انا فاضي اسمع كل ده هي مره وشكرا

- لأ معلش حتي لو مش فاضي لازم تسمع كدا اومال عايز تجيب 60 من 60 ف التاريخ ازاي ؟ عايز تحقق حلمك سواء سياسه واقتصاد او السن او اعلام ازاي ؟ ايه اللي يميزك عن الطلاب الباقيين ؟ ايه اللي يخليك تطلع اوائل جمهوريه او ادارات 

والمصحف احنا قادرين نعمل كده و زياده بس مفيش اراده استعينوا بالله وربنا هيكرمكم

* نكمل بقي زي م  شرحت ف الموضوع الأول ان لازم تخصص يومين عشان تراجع المنهج كلو وانا مش هكتبها تاني عشان اتكتبت واتشرحت بالتفصيل ف الموضوع الاول وانتم فهمتوها أكيد ..

اخر نقطه ف موضوع التاريخ بقي 

الماده دي بتتنسي كتير بس لو مشيت ع اللي قولته فوق + خصصت يومين تراجع فيهم المنهج هتلاقي الامر سهل 

التواريخ تحفظها زي اسمك اجابه منغير تاريخ هتنقص درجه وانت اولي بيها 

التاريخ مبيتلمش يعني لو كبرت دماغك منو طول السنه لأ ريح نفسك بقي واقسم السنه احسن لانك مش هتلحق تلمو وهتشيلو حضرتك 

وزي م قولنا ف الموضوع الاول تراجع ورا مدرسك من كتاب المدرسه وحاول تحل تدريبات كتاب المدرسه

امتحان التاريخ اخر السنه مبيجيش كلو صعب لأ بالعكس بتبقي في اسئله واضحه كتير يدوبك سوالين كده عايزين فهم وبيتحلوا يعني مش صعبين للدرجه ي بشاوات ووضيفتك انك تتدرب ع الصعب 

الامتحان اخر السه بيكون معدي ال30 سوال تقريبا في اسئلع عليها درجه وفي اسئله عليها درجتين او تلاته 

***********

* فلسفه ومنطق 

قبل م أبدأ الماده دي ملهاش وصف وربنا بس حاجه هطلع ميتين حضرتك بجد *سوري ي شباب انفعلت شويه*

الفلسفه اولها تقيل واخرها سهل بمعني

اول المنهج هتلاقيها بايخه شويه الحفظ فيها وحش يعني مضيقاك من الاخر

انما ف الوسط والأخر هتلاقيها حلوه جدا وحاجات انتم عايزين تعرفوها اصلا ..

الفلسفه هتتكلم عن : الفلسفه البيئيه والطبيه (البيوتيقا)والمهنيه والأخلاق

البيئيه هترخم معاك وخاصه جزئيه هانز يوناس واصدقائه الحلوين بس مع التكرار هتبقي تمام .. لاتفقد الامل ي صديقي 

الطبيه والمهنيه والأخلاق حلوين ولذاذ بس هتلاقي ف كل واحده تكايه بسيطه بس هتعرف تحفظها 

بس من الاخر الفلسفه حفظ أعمي يعني تصم الصفحه وانت ساكت ..

المنطق 

ده بقي اوله رخم وسطه حلو اخره رخم 

وفيها نسبه فهم شويه عشان تعرف تحل فيها يعني الفلسلفه حفظ والمنطق حفظ بردك بس في جزئيه فهم لأنك هتحل مسائل بس متخافش هما عارفين ان حضرتك هربان من الرياضه حاجه خفييفه ملهاش علاقه بالرياضه ..

بس لا تقلق بردك حفظها بيكون حلو وفهمها سهل ..

*مهمتك :

زي م قولت ف التاريخ بالظبط 

الماده متتركنش تتذاكر ف يومها تتسمع 4 مرات زي م قسمتهالك فوق 

ف نفس اليومين اللي خصصتهم للمراجعه هتراجع فيهم بردوا المنهج كلو 

(بنبه تاني الناس اللي مشفتش الموضوع الاول خسرت كتير انا شرحت فيه ازاي نراجع المنهج كل اسبوع هتلاقه الرابط فوق)

هقولكم ع الامتحان بيجي ازاي بعد م اشرح علم النفس لأن بينهم حاجات مشتركه 

***********

* علم النفس والأجتماع

هلا والله هلا بالغالين ..

لأ والله ماده حلوه ودمها خفيف وفيه شويه قله ادب ف النص XD 

بصوا لو هنقارن بين الفلسه وعلم النفس فهنقول ان علم النفس أسهل بس أطول 

بس نبص للجانب المشرق انها اسهل 

علم النفس هيتكلم عن 

الذكاءات + النمو + الشخصيه + الاضطرابات والقلق + حيل الدفاع النفسي

لأ مواضيع حلوه وهتحب انك تدرسها اوي هتحسها هتفيدك جامد 

كنت بستمتع بحصه علم النفس جدا بصراحه ^_^

علم الاجتماع 

مواضيعه حلوه مش هتفيدك بس لازم تتحفظ صم 

*مهمتك :
زي م قولت ف التاريخ والفلسفه بالظبط 
الماده متتركنش تتذاكر ف يومها تتسمع 4 مرات زي م قسمتهالك فوق 
ف نفس اليومين اللي خصصتهم للمراجعه هتراجع فيهم بردوا المنهج كلو 
(بنبه تاني الناس اللي مشفتش الموضوع الاول خسرت كتير انا شرحت فيه ازاي نراجع المنهج كل اسبوع هتلاقه الرابط فوق)

الأمتحان بيجي ازاي بقي 

صحصح كدا وفوق عشان الغلطه ف ماده الفلسفه و المنطق او علم النفس والاجتماع ب 3 درجات 

ايوه 3 درجات للغلطه الواحده 

لأن للأسف الامتحان بيجي 20 سوال (10فلسفه و10 منطق وكذلك || علم النفس والأجتماع10 علم نفس 10 علم اجتماع || كل سوال عليه 3 درجات يبقي 20*3 يساوي 60) يعني الفلطه بتلت درجات يعني الناس اللي بتحفظ نص الاجابه وتفكها من النص التاني اقولك هتتنفخ و فخري .. اه هتتنفخ وربنا 

نحفظ الاجابات كامله يعني لو الوسال اجابته 3 نقط كل نقطه عليها درجه 

هيقابلك ف المادتين اسئله اجابتها 9 نقط .. اه 9 نقط بس متخافش ف اامتحان هيطلب منك 6 او اقل فأنت قدامك اما تحفظ 6 وتحفظهم حلو اوي او تحفظ 9 كلهم (انا عن نفسي كنت بحفظ ال9 كان عندي اعتقاد مريض اني لما اكتبله ال9 نقط وهو طالب 6 هيفكر اني شطوره بقي ومتفوئه -_- أعتقاد مريض معلش *)

يبقي نحفظ اجابات كامله ومنعكش وحياه ابوكم .. واقولكم تاني عايز تضمن تقفيل الادبي كرر كتير سمع كتير لأنك هتخش الامتحان ترص كل ده واوعي تقول الجزئيه دي ف اخر المنهج مش هتيجي احب اقول لحضراتكم ان المنطف نص الامتحان كان من اخر المنهج

***********

الجغرافيا 

والله الماده دي كانت بتهون عليا القرف ده كلو 

احلي واخف ماده 

تحسها بتطبطب عليك وتقولك معلش ي بيبي XD 

مش معني انها خفيفه انها تتركن لأ تتذاكر اول باول واخلص منها

الخرايط ميغركش ان فيه اطلس والهري ده لأ متخفش الخرايط سهله اوي وباذن الله ميكونش عندكم رسم 

***********

 كده اتكلمت سريعا عن المواد الأدبي 

والله ي اصحاب مواد سهله وحلوه وبتتقفل بسهوله

وزي م قولتكم وبكرر تاني الأدبي عندنا حفظ والله حفظ يدوبك بس هتفهم صيغه السوال ازاي والباقي بترص اللي حفظته 

مترميش المنهج حاول ع قد م تقدر تخصص يومين ف الاسبوع تراجع فيهم المنهج كلو وانت مع التكرار هتلاقي نفسك بتسمع الملزمه اللي هي 8 صفح ف 5 او 10 دقايق والله عن تجربه ..

الناس اللي سألتني اذاكر من الملزمه ولا الكتاب الخارجي ؟

بصوا .. الكتاب الخارجي كويس جدا بس بردك بيسيب جزئيات مش بيكتبها وده انا شوفته لما كنتبذاكر بس انا عشان كنت براجع من كتاب المدرسه اخدت بالي وكنت الجزئيات اللي مش مكتوبه بكتبها وبذاكرها مع نفسي 

الملزمه احسن بشرط انك تتأكد ان كل اللي مكتوب فيها هو هو اللي ف كتاب المدرسه ولو في جزئيات ناقصه انقلها واحفظها 

مش لازم تجيب كتاب المدرس وكتاب خارجي (لو مقتدر هاتهم) بس كتاب المدرس غالبا بيكون لامم كتاب المدرسه ع اهم الاسئله اللي ف الكتب الخارجيه خليك اخر السنه هات المراجعات النهائيه وحل منها 

انا كده خلصت 

واسفه ع الاطاله .. واسفه لاضاعه وقتكم الثمين 

وشكرا للرسايل والتشجيعات الحلوه اللي جتلي ع الصفحه والاكونت بتاعي 

والله ي جماعه كلكم قادرين تحققوا اللي نفسكم فيه بس اهم حاجه العزيمه والضمير ف المذاكره 

متقولش انا كنت فاشل 1 و 2 ث أكيد مش هعدي 3ث

لأ ي بابا فوق وصحصحلي .. كلامك غلط 

انت 1 و 2 ث مكنتش بتذاكر .. كنت ليله الامتحان تحضرلي مراجعه تروح تبص فيها ويدوبك تحل بالعافيه اللي ينجحك .. انما ف 3ث الأمر هيختلف انت هتذاكر وتتعب وتحل كتير وتحفظ وتسمه ويطلع عين اهلك .. واخرالسنه ربنا هيقدر تعبك ومجهودك وهيكرمك اخر كرم 

ربنا يوفقكم ي رب و يكرمكم ويسهلكم اموركم ..

حاليا معظم الملازم اللي نازله عربي وانجلش ونزلنا بردوا باب اول كميا وباب اول جيولوجيا بالتوفيق ي رب

اي حد عايز ملازم لحاجه معينه يقدر يبعت وهنحاول نوفرها وقريب هنزل كتب المدرسه pdf كمان كتب خارجيه pdf وبوكليت ع كل باب ف كل ماده 

تابعونا ..

ومتنسوش لايك للبيدج وشير عشان نفيد أكبر عدد ممكن ..